शेयरका लागि लाइन बस्नु नपर्ने, हाइड्रोमा अनलाइनबाटै लगानीको बाटो खुला

पुस २५, काठमाडौं (अस)। जलविद्युतमा लगानी गर्न चाहँनेहरुले अब शेयर भर्नका लागि लामो लाइन बस्नु नपर्ने 

भएको छ । अनलाइनबाटै लगानीको प्रतिवद्धताका लागि भनेर सोमवारबाट ऊर्जा मन्त्रालयले नयाँ वेबसाइट 

www.moenonline.moen.gov.np शुरु गरेको छ । मन्त्रालयमा सम्पन्न पत्रकार सम्मेलनमा ऊर्जामन्त्री जनार्दन 

शर्माले उक्त वेबसाइटको उद्घाटन गरेका हुन् ।

नेपालको पानी जनताकोे लगानी कार्यक्रमको ३७ वुँदे प्रतिवद्धतापत्र कार्यान्वयन गर्न, सो प्रविवद्धतापत्रको बुँदा नं.

५, ७, ८ र ९ लाई व्यवहारिक रुपमा कार्यान्वयन गर्न साथै हाईड्रोमा लगानी जुटाई लगानी सुनिश्चित गर्न उक्त 

प्रतिवद्धता फारम अनलाईन मार्फत भर्ने व्यवस्था गरेको ऊर्जामन्त्री शर्माले बताए ।

जलविद्युतमा लगानी गर्न इच्छुक व्यक्ति (देशभित्र वा बाहिर जहाँबाट भए पनि), वा कम्पनीले एकमुष्ट वा 

वार्षिक रुपमा लगानी गर्न चाहेको रकमको प्रतिवद्धता वेबसाइट मार्फत् गर्न सक्नेछन् । जसका लागि वेबसाइटमा 

आफ्नो एकाउण्ट खोली लग इन गरेर प्राप्त हुने निर्देशनहरुका आधारमा आफ्नो प्रतिवद्धता पेश गर्नुपर्ने हुन्छ ।

यसरी गरिएका प्रतिवद्धताअनुरुप हुन आउने लगानीका आधारमा तत्काल निर्माण गर्न सकिने 

जलाशययुक्त तथा पिकिङ् रन अफ रिभर आयोजनाहरुमा लगानी गरिनेछ । यसो गर्दा लगानीकर्ताहरुलाई 

उनीहरुको लगानीद्वारा बन्ने आयोजनाको बारेमा जानकारी दिइने र लगानीबापत पाउने मुनाफा सम्बन्धित 

आयोजनाबाटै प्राप्त हुने मन्त्री शर्माले जानकारी गराए ।